Садыр Жапаров, экс-депутат: “Дастан Сарыгуловду камап, сулуу чымчык болушпай эле койсун”

“Кумтөр” десе жеген ашын жерге койгон, мунун айынан бийликтин биринчи душманына айланган Садыр Жапаров менен байланышып, кен тегерегиндеги соңку чыр-чатактар тууралуу баарлаштык.

– Садыр мырза, “Кумтөрдө” коррупциялык иштерге аралашкан, “мыйзамды эмес, Майрам Акаеванын айтканын аткарууну жогору койгон” деген доомат менен Дастан Сарыгулов камакка алынды. Эгер бул бийлик чындап коррупция менен күрөшсө, эң биринчи кимди камакка алыш керек эле?

– Эгер Атамбаев чындап адилеттүүлүк болсун десе күнөөлүүлөрдүн баарына бирдей караш керек эле. Дастан Сарыгуловду камап алып, мына эми “Кумтөрдөгү” коррупция менен күрөшүп атабыз дегени жаш баланын оюнуна эле окшоп жатат. Анткени, ал жерде Дастан Сарыгуловдон да жаман иштер менен алектенгендер бар. Атамбаев кыйын болсо, ошолорду дагы ачыкка чыгарышы керек. Элди “Кумтөрдөгү” коррупция менен күрөшүп жатам деп соороткону болбогон иш.

– Эми “Кумтөр” боюнча жасалып жаткан иштер адилеттүү жүрөбү же бийлик заматта канадалыктардын адвокатына айланабы?

– “Кумтөр” боюнча көтөрүлүп жаткан маселе жогоруда айткандай оюн эле болуп калат. Ал эч качан адилеттүү жүрөт деп ишенбейм. Себеби, беш жылдан бери эле бийлик “Кумтөрдүн” адвокатындай таасир калтырып калган. Элди “кыйратып жатабыз. Биз күрөштү күчөттүк” дегени менен дагы деле жең ичинен соодалашуу, “бармак басты, көз кысты” деген саясат менен алек болушат. Анткени, ал жерде чынында сүйлөшүү башка нукта жүрүп жатат. Ошондуктан, “Кумтөрдүн” маселесин чечейин деп билек түрүнө киришкен деле киши жок. Эптеп элди алдап, түпкүлүгүндө башка маселени ишке ашырууну эле көздөп жатышат.

– Бизге жеткен маалыматтарга караганда ар бир келишим түзүлгөндө, ошондой эле ар бир комиссиянын текшерүүсүндө коррупциялык схема калкып чыгат экен. Эгер ошол маалымат чын болсо, Атамбаев да ошондой оюнга аралашканбы?

– Сиз уккан маалыматтын чындыгы бар. Ага баары аралашкан. Аны танам десе, тастыктаган колдору бар. Ошон үчүн Дастан Сарыгуловду камап, “коррупция менен күрөшүп жатам”- деп сулуу чымчык болушпай эле койсун. Дагы айтам, алардын андай иштерге аралашканын тастыктай турган колдору турат.

– “Кумтөр” боюнча кандай маселе көтөрүлсө дагы эмнегедир акционерлердин аты ачыкка чыкпайт. Алардын арасында азыркы бийликтегилер да барбы?

– Бар. Ошон үчүн аттарын ачык жарыялабайт. Негизи алардын атын чыгарыш үчүн, алардын акционер экенин далилдеш үчүн чын жүрөктөн тергөө иши жүрүш керек. Ошондой эле оффшордук компаниялар аркылуу кайсы биздин атка минерлер акцияга ээ экенин далилдеп чыгуу учур талабы. Далилсиз эле “баланчанын акциясы бар” десек туура эмес болуп калат.

– Бийликтегилер “Кумтөр” үчүн күрөштү “баштадык” дешти.  Эгер чындап күрөш башталса, анда эмнеге  сиз жетектеген комиссиянын чыгарган корутундусун колдонбойт?

– Анткени, өздөрү коррупцияга белчесинен батып алышып, чыга албай олтурушат. Ошол былыктарыбыз ачыкка чыгып кетет деп кооптонушуп, мен жетектеген комиссиянын  корутундусун көз жаздымда калтырып, элдин, жердин кызыкчылыгын коргобой жатышат. Ошон үчүн булар “Кумтөр2 маселесинде жарытылуу иш жасаарынан шек санайм. Булар “артымды тазалайм, былыктарымды жабам”,- деген саясат менен гана алек болушат .

– Эгер сиз айткан сөзгө ынан турган болсок, бийлик анда кандай максат менен “Кумтөрдөн” пайда көргөн сүткорлорду иликтей баштады?

-Жогоруда кеп кылгандай, бийлик жөн гана элди алаксытуу максатында көз боемоочулук кылып, элди алдап “коррупция менен күрөшүп жатабыз” деген түр көрсөтүүдө.. Анткени,  “Кумтөрдөгү” калган алтынды алып чыгып кетишкенче так ушундай тактика менен иш кылып, тигилерге элди алдап, шарт түзүп берип жатышат.

– Кыргызстан тарабынан издөө жарыяланып, чет мамлекеттердин биринде кармалып, кайра бошотулган Хоменюктун каты бу сапар неге маанилүү болуп, кылмыш ишин козгоого негиз болуп жатат?

– Менимче, Хоменюк өз каты менен биздин бийликти” көзүңөрдү ачкыла, керек болсо ар бириңердин алып жүргөн параңарды ачыктап коем” деген  окшойт. Болбосо, ага кат жазып башына не күч келди дейсиң.

– Бирок, айрым аналитиктер кыргыз бийлиги менен Хоменюктун  ортосунда кандайдыр бир соодалашуу жүрүп жатат деген кооптонгон ойлорун ортого салып жатышат го?

– Албетте, бүгүн соодалаша элек болсо эртең сөзсүз соодалашышат. Себеби, Хоменюк дагы бир жыландын башын кылтыйтып туруп, анан булардын мойнуна тузак салып алат. Болду, ошону менен “текшерип атабыз” демиш болуп, дагы беш жыл өтөт. Калган каткан алтындын запасын ошентип чыгарып кетишет. Менимче, мына ушундай саясатты ишке ашыруу үчүн ушундай оюндар жүрүп, ага Дастан Сарыгулов садага чабылып жатат. Болбосо, азыркы бийликтин өзүндө дагы ошондой катачылыкка жол берген, ал тургай туурап эмес иштер менен алектенгендер четтен чыгат.

Булак: “Майдан.kg” 

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *